رجالة متنفعش للجواز

بسم الله الرحمن الرحيم

والصلاة والسلام على خير الخلق أجمعين سيدنا محمد خاتم الأنبياء والمرسلين

أقدم لكى أختى العزيزة صفات الرجال الذين لا يعتمد عليهم ولا يصلحون للزواج

فاحذرى ولا ترتبطى بأحدهم

1- دلوعة ماما

صفاته

( واد قشطة وناعم وبسكويت , لا يستطيع أخذ رأى مستقل - أمة بالنسبة له كل شئ

مش لحبة فيها لكن لعدم قدرته على الاستغناء عنها - ينهار عند اول مشكلة تواجهه عندما

ماما بعيد عنه - لما بيدخل الجيش بيقولوا علية فرفور لأنه مبيعرفش يزحف ولا يمسك السلاح

وكل ما الشاويش يأمروة بأمر يقعد يقول فينك يا مامى )

اللى بيشدك فية فى البداية

( حتلاقية حنون " لأنه متعاملش مع رجاله " - وحتلاقية رومانسى وكلامة حلو - وحتلاقية واد

مسبسب شعرة وحاطط علية جل وحاطط برفان حريمى ولابس سلسلة وانسيال )

المصيبة

( لما يقولك ان بيكى قالت لميمى وميمى قالت لتاتو اللى هى ماما انك بنت حلوة واستايل

ومش ممكن تكونى الا لسوسو اللى هو انا )

لكى تتخلصى منه

( قولى له انا عايزة اتجوز راجل اقدر اعتمد علية مش اتجوز راجل معتمد على ماما )

2- البخيل

صفاته

( مبيغيرش الشرز اللى علية بقالة سنتين ولو كنا فى عز الصيف - يتزوج بعد ال 40 - دايما

بيقضى مشاويرة مشى ويقول " المشى رياضة " - بيحط كلونيا ام 4 جنية بدلا من البرفان -

مبيشتريش أكل من برة البيت ويقول " اصل الاكل برة البيت ممكن يكون مش نظيف " ولو كان

فى مطعم شيك - لما يحب يتفسح يتمشى على الكورنيش " عشان ببلاش " - عامل دفتر

توفير بيحط فية كل شهر كل اللى بيكسبة ويقعد طول الشهر من غير ولا مليم فى جيبة -

دايما يقول ان القرش الابيض ينفع فى اليوم الاسود )

اللى بيشدك لية فى البداية

( انه قنوع ومدبر - يرضى بالقليل - يحب البساطة )

المصيبة

( انه بيروح للبنك عشان الايداع فقط لان معندهوش حاجة اسمها سحب -

ولما يجى يعزمك على فسحة يفسحك فى حديقة عامة ويغديكى ترمس ويعشيكى حب العزيز

ولما يروحك مبيوقفش تاكسى بحجة ان مفيش تاكسى فاضى وانه عايز يفرجك على مناطق

مينفعش تشوفيها الا من المترو )

لكى تتخلصى منه

( قولى له انا عايزة تكتبلى الشقة بإسمى وتحطلى 100 ألف جنية فى البنك )

3- الرياضى جدا

صفاتة

( قوى - جرئ - يلعب اغلب وقتة - يلبس ترينجات )

الشئ اللى بيشدك لية فى البداية

( جرائته وجسمة الرياضى وحيويته ونشاطة )

المصيبة

( انه يقضى اغلب وقته بره البيت اما بيمارس الرياضة واما مع اصحابة فى النادى - لما يقعد فى

البيت حيقعد يسمع الماتشات وانتى حتبقى حتموتى عشان تسمعى الحلقة الاخيرة من

المسلسل لكن ميرضاش يجيب المسلسل ويفضل يسمع الماتش - لما يتكلم معاكى يتكلم

عن فوز الاهلى على الزمالك و فوز جون سينا على بيج شو )

لكى تتخلصى منه

( كونى مشجعه متعصبة للزمالك )

4- المهندم

صفاته

( أنيق جدا - يلبس كاجوال أو كلاسيك لكن فى كلاتا الحالتين بيكونوا سينية " ماركة " - بيعرف

كويس فى الموضة )

الشئ اللى بيشدك لية فى البداية

( تناسق ملابسة وأناقتة )

المصيبة

( انه بيقعد قدام المراية أكتر منك ودولابة ملايان ملابس اشيك واجمل واكتر من ملابسك -

بيحب الخروج للتسوق وشراء كل موديل جديد - يقطمك على المفروض يكون علية مظهرك )

لكى تتخلصى منه

( قوليله ان ذوقك بلدى قوى )

5- البصباص

صفاته

( يحب النساء جميع النساء السمرة والشقرة التخينه والرفيعة والطويلة والقصيرة - يعامل كل

النساء بلطف )

الشئ اللى بيشدك لية فى البداية

( انه مجامل رقيق - كلامة معسول بيحسسك بأنوثتك )

المصيبة

( انه بيقول الكلام ده لكل النساء )

لكى تتخلصى منه

( قوليله انا حددتلك ميعاد مع بابا عشان تخطبنى )

6- المثقف

صفاتة

( دايما معاه كتاب او مجله بيقرأ فيها - بيلبس نظارة من كتر ما مقق عينية - يستعرض ثقافتة

اثناء الكلام - بيستخدم الفاظ مجعلصه أمثال الدراماتيكية والبراجماتية والامبريالية )

الشئ اللى بيشدك لية فى البداية

( حديثة الجذاب - لباقته فى الكلام - ثقافته )

المصيبة

( انه مش حيفسحك ولا حيخرجك ولو حصل حيبقى لمعرض الكتاب او لحضور ندوة علمية -

دائما شارد الذهن يفكر فى قضية معينة او حدث معين - لا يتكلم معك الا عن الليبرالية

والرأسمالية والعولمة - دايما يفكرك بأنك ذات فكر قاصر وان قدامك 200 سنه عشان تكونى زيه )

لكى تتخلصى منه

اخبرية انك مثقفة اكثر منه

7- رجل الاعمال

صفاتة

( ذكى - طموح - دايما مشغول - بيهتم بالبورصة " عشان الاسهم بتاعته " )

الشئ اللى بيشدك لية فى البداية

( حماسة وطموحة - نجاحه )

المصيبة

( بيقضى اغلب وقته فى العمل - ولما بيخرج معاكى بيبقى عشاء عمل مع ناس شعرهم ابيض

ونكتهم قديمة - لما يقعد معاكى يتكلم عن بورصة نيويورك والاسهم والسندات - معندهوش

وقت للترفيه ولا عنده وقت ليكى - السكرتيرة هى اللى حتبقى معاه طول الوقت وفى الغالب

بيتجوزها فى السر فى النهاية - لو اسهمة نزلت تبقى كارثة وينكد عليكى ويمكن يموت فيها )

لكى تتخلصى منه

أخبرية انك ستقضين معه عدة ساعات فى المكتب لأنه موجود به اغلب الوقت

ابقى اكملكم بعدين

سلام مؤقت

كلام جميل وصحيح100/100

ده على كده يا استاذ احمد محدش هيتجوز هههههههه